Kalpasan dagiti adu tawen, agingga ita, ammok a dimo sungbatan ti
Saludsodko no sadinnot papanan dagiti bulong ti Oktubre
Dagiti arasaasda a mangriing kenka iti parbangon--
Dagiti billit-tuleng nga agsubli-subli mapan Diaton.
Sinapsapulko ida ta kayatkot sumorot ngem ibatidak met a kanayon!
Adu kari, ad-adu pay a kararag ti maidaton kenka, kasano ngarud a denggem
Dagitoy daniwko? Adu dungngo ken ruknoy, ngem aniat nagtungpalanda?
Uray kasta, awan kas kenka, no ar-arigem buok ken kudil ti danum; awan
Kas kenka no ar-arigem ti rosal ken hasmin--
Ammok apaman nariknak ti angin aggaput amianan. Ammok apaman
Nangngegko ti naganmo kadagiti kawkawayan.
O Baton Bituen, mangngegmo pay laeng dagiti balikas dagiti pimmanawen a
Gagayyemko, dagiti padak naulila ken ayat diay Bukana? Pakawanemto pay
Ngata dagiti anninawanda, ti kararag ken tarigagay a nagbalin alumiim
Iti nalaus nga ayatda kenka?
Aniat nagbalinan dagiti adu nagan ti ayat nga inyanud ti danum, ti asugda a
No maminsan danggayan ayug ti gitara? Basolda ngarud no awan nasudsudi
A makitada no di sika? Ngamin diak man ammo no apay adu unay dagiti
Palimedmo kadakuada. Palimed ti arbis, palimed ti rabii kadagiti sangsanga
A naglingedan ti bulan, uray idi kasta unay bannogmi a nagna iti kapanagan,
Uray iti kasta unay pudot a nakadanonkami diay kadamortisan, uray idi agawidkami
Ket awan nakalagip mangibalon pamedped bisinmi, dandanikam pay napukaw
Iti sumipngeten a dalan nga agsublit ili, ket nagsisinakami nga awan
nagun-uni...
Isu nga ita awan mabati no di ti arasaas ti karayan iti saan adayo
Ket kas kanayon, daytoy daniw ti Oktubre a sumangbay kenka...
Iti ngatuen dagiti bambantay, mapan Alsem ken Visaya
Kasta unay bengbeng dagiti bakir, dagiti tumatayab kasta unay ringgor ken ikkisda.
Agmalmalem kas man ibalbalikasda ti naganmo.
Iti aglawlaw, iti lennaaw, nakalablabbatis dagiti sabong, malmeska iti ayamuomda!
