Bislak

(Nagan ti Karayan ti Vintar)

Agtarayak a mapan diay karayan

Ket lumabasak diay daan a simbaan.

Sabatennak manen dagiti uppat a balikas

Iti Latin: Haec Est Domus Dei.

Ni Apo Dios Adda Ditoy Quet Ayabannaka.

Isu ngata a naidaw-asak ita…nupay adda timek

A sumabat kaniak: Manong, awanen daydi salog

Mapan amianan wenno daya.

Ngem ayabannak met latta ti makapurar a langit,

Sarabuennak ti danum, ayabannak dagiti damortis

Nupay awandan diay karayan a nagpatpatudanmi,

Dagiti gagayyem nga awanen

Ditoy daga, danum a kanagnaganna

Ti lasag ken dara, danum nga aggaput bukana

Nalaing a gayyem… Ta nagmalmalem kami, kasta unay

Unget ni nanangko a mangpaspasungad kadakami.

Ngem itan limmabasen dagiti tawen

Ket diak man nalagip ti nagsubli, nalipatak no ania kayat

A sawen dagiti bituen, nalipatak ti sainnek

A kanayon mangngeg kadagiti daniwko:

Touk ni ayat, lipatemon!

Garakgak dagiti kawayan, ayandan?