Mabalin maysanto nga ubing ti makakita
No aniat nagbalinan dagiti daniwko.
Sabong nga agkaiwara: Idiay Bucana ken Baton Bituen,
Idiay kapanagan, iti tengngat Abril
Kadagiti busbusilak ken remremmek
A nagayusan ti Karayan Bislak…
Mabalin agukraddanto manen,
A kas panagsabongda idi iti nalimed a lubongko:
Iti lamiis ti parbangon
Iti arasaas dagiti bulong a dinalapus ti angin
Idiay salog, mapan amianan…
Rummuardanto amin iti kasipngetan
(Ta saan mapukaw ti pudpudno nga ayat ditoy lubong!)
Iti dateng ti rabii ken arimekmek ti tudo
Iti palimed ti ledda, lumot ken ramrama.
Agsublindanto amin sadinnoman naggappuanda:
Kadagiti bibig ken barukong ti agsapa, iti sidong
Ti napukaw a darang ken duayya
Dagiti anninawanda a mangguyod rumimrimat a rabii-
Rinibu a bituen nga agbalin katapokan
Ket kinaykay ken inakup dagiti babbalasang
Kadagiti paraangan iti malem
(Sakbay mapanda agsakdot danum iti sellag ti bulan!)
Mabalin makigtotdanto a makaimatang:
Sinaksako, kinurkuribot! Agalimuyongto pay rosas
Manipud Daya, aggingat Pakris!
Dagiti lumabas, agsardengdanto
A tumangad iti langit, kas man agaligagaw a makangngeg
Iti arbis aggaput laud, iti ayamuom
A mangriing kadagiti matmaturog ken agayan-ayat:
O Bulan Bislak, sabong toy sainnek
Sikat silawko, saranay ken sam-it!
