|
|
|
Umayka, bulan, denggem toy sainnek,
Vintar ditoy pusok, agek ken ayat!
|
Dinak basbasulen, Tatang, no daytoy laeng ti kabalinak
Ta idi rabii kasta unay libnos dagiti babbalasang a limmabas.
Inagkan ti bulan ti bu-ok ken kudilda, nakalam-lamuyot! Darepdep
Kunak koma ngem kasta unay met sutil ken katawada!
Idi sumorotak kas man asuk a nagpukawda iti rabii
Ket nagbalinda a bituen diay daya…
Basulko ngarud no naladaw daytoy a pakada?
|
Aniat’ oras ti parbangon idi sumang-atka? No makitam daydi nanangko
Saludsudem man no sapay agpa-uyo unay ni kabsatko.
Awagak no maminsan ngem kasla awan met mangngegna
Sinapulko ngarud dagiti tumatayab, arasaas ti tudo. Si-it ken pudot
Ti Abril inkidemko.
Iti bannogko, diak napuotan no kasano nga inayabannak ti karayan
Ket dinigosnak iti ayamuom ti rabii: Apagbukar a bibig
Nalabbaga a sabong
Nayanud ket nalmes ditoy barukong…
|
Kaano pay a pimmanaw dagiti alimuken diay kapanagan?
Kaano ti naudi a panagpasurongmo iti puraw a kabalyom?
Tudo man wenno init, panawannaka met latta ti lubong.
Nalipatak nga iti tunggal maysa, adda oras a dumteng.
Nalipatak no asinno dagiti immay nakidung-aw aggaput’ Surong.
Dagiti bantay a sinang-atda, karayan ken kadaratan
Gaput’ayug ni ayat nga inruknoymo kadakuada.
|
Kitaem: Agpa-Surong dagiti kakabsatko ket agsardengda diay Bukana!
Dika mamati ti kaadu dagiti masabatmi nga agpa-daya!
Tunggal balay a labasak, ibalikasda ti naganmo.
Ayabandak pay dagiti dadduma, ngem mabutengak met kadagiti aso.
Taulanda ngamin dagiti padak agsapul ayat ken karayo
Aglalo ket awan met ipakitak no di daytoy iliw, nasam-it a dila!
|
Ita ta awankan, kayatkot’ mapan aglinong iti sirok ti mangga
Bareng mairidepak iti pul-oy dagiti bulong ken sanga.
Kas kenka, raniag ti lubong a nariingak, raniagto met a panawak
Ket awan ibatik no di daytoy daniw, sam-it ken sa-em ti biag.
|
Umayka, bulan, denggem toy sainnek,
Vintar ditoy pusok, agek ken ayat!
|
|
Don Pacis
(For the first anniversary of my father’s death, May 23, 2003) ...More
|
|
