Iduldulinmo pay kadi ti kumpay a napukawko maysa aldaw
A nangruotak para tay kabalyo ni Tatangko? Puypuyotam pay kadi
Diay silindro a natnagko maysa bigat ti Sabado? Ket dagiti lagip, sugat
Ken sam-it ti nasapa nga ayat -- iduldulinmo pay kadi?
Idi dimmakelak dita sidongmo nakaadadu pay laeng dagiti dalag
Ken bukto; nagum-uma kami iti suso ken birabid, tinawen
Nga aglayus, dandaniak pay nayanud batog diay kamposanto
Diay laud!
Malagipmo kadi dagiti dadakkelko, da Jose ken Macaria
A mapan Surong tunggal parbangon ti Lunes, ket agimukmukat
Pay laeng dagiti kakabsatko a mangpalubos kadakuada
Sakbay nagluganda nagpa-Bukana?
Ket ti agir-irig a kuribot iti kapudotan ti aldaw, ti bukodmi a dagsen
A makigasanggasat ditoy lubong -- nakitam no kasanot rigatmi?
Namin-ano nagnakami ken kabsatko iti init ken tudo
Mapan agbantak, agbanniit ken aganup iti agsapa...
Mangngegmo pay laeng ti aweng ti kanalbuong idiay karayan --
Diay batog ti simbaan, iti asideg dagiti aba ken ramrama
A nangsirpatak iti anninawan ti danum, ti tangatang
A kinibur ni kabsatko iti apagdarikmat -- nakitam no kasanot
Panangbatoknat dalag kadagiti gumilgilap a siksik?
Kasta unay lamminna idi sumang-at diay teppang ti Karayan Bislak!
Ngem itan nabayag a pimmanawen dagiti alimuken, ti angin
A nagbalin nabara pul-oy aggaput talon amianan...
Ken dagiti babbalasang, ti pudawda a nakasilsileng kas man ules ti langit --
Apay nadigos ti kudilmo iti kinalasbangda, ket saan man
Malipatan toy kararrua ti sumken nga ayamuom idi nagukrad ti sabong
Iti barukongda? Kasta unay amakko umanges
Amangan mangngegdat rugso ti puso a nakaimatang guduat langit!
Idi naudi addaak dita, agsangsangit ni adingko ta nakagarot ngamin
Diay diaske a kabalyo, ket saanmi ammo no sadinnot nagturongnganna,
Diay Dagui, Abkir wenno Cabayo.
Asinnot akimbasol no pinanawannak dagiti bulan ken tawen? Diak pay
Ket malagipen dagiti gagayyemko a saan nagsubli, dagiti adu rigat ti biag
A binukbukodanda, dagiti padak awanan gasat ken namnama
Ta idiay tengnga ti kapanagan awan pulos makaam-ammo kadakami!
Ngem itan makitak nga awan pamalbaliw ti ranggasmo kadakami
Awan sungbatmo no di dawel ken dalluyon iti tunggal kararagmi!
Idulinmo ngarud diay kumpayko, ngem puyotam sagpaminsan diay silindro
Tapnon agtalna dagiti bartek a rinabii malmes iti barukongmo!
