NO MAKITANAK A MAGMAGNA DIAY IGID TI KARAYAN      (ni Don Pacis, Jan. 2007) No makitanak a magmagna diay igid ti karayan, ammom a mailiwak iti lamiis ti danum. Ket no mapanak diay kadamortisan, ammom nga adda pay laeng siit ken sanaang a nabati ditoy barukong... No saggaysa inaganak dagiti tumatayab, ammom a sapsapulek manen ti Abril kadagiti sabong ti rosal iti malem. No nalipatak ti kallugongko ket mapurarak iti init, ikkannaktot bulong a paglinongak. No maigalisak iti lumot, tulongannakto; no malamminak, ikkannaktot pagimengko; no mabannogak, Guyoddennakto diay igid; saranayennakto; tengngelennakto a nakair-irut iti abaymo. Ngem no agnepnep ket nangatot danum, ammom nga aglaglagtoakto diay asar iti kaadut bukto! No agpukan ken agpuorak iti sirok ti mangga, ammom a malagipkontot asuk ken ayamuom ti maysa Disiembre. Ket no agsukdalak iti mansanas; no pidutek dagiti naluom a bunga diay batog ti bubon; no punasan ken pagpagek dagiti kuton-- Ammom nga addanto sabali aldaw a liwliwa sakbay agsublit danum aggaput surong!