|
|
SYLMAR, CALIFORNIA
(Para ken Jose Agmata Pacis, 1916-2003)
Ti pangrugiak ket isu met ti paggibusam.
Ti pagsardenganmi isu met pagtungpalam.
Ditoyen ti pagsinaantayo, Tatang. Nanumo a tanem
A labasan dagiti aldaw ken rabii, raniag ti bituen
Dagiti awan sardengna sasakyan nga agsubli-subli
(Saan a kas kamposantotayo diay Vintar, iti ruar ti ili!)
Asideg pay ditoy ti L.A., pagay-ayaman dagiti artista
Saannak masdaaw no kaarubamto maysa kadakuada!
Dagiti kailian ken kakabsat…kasta unay dagiti sabong nga imbatida
Kenka! Agdardarasda ngamin ta adayo ti naggappuanda.
(St. Louis, Kansas City, Chicago—immayda amin nagpakada
Agraman taga-Surong, padam a maestro ken maestra)
Uray ni Cecilia a nakaad-adayo, inkarigatanna!
Kurangna laengen dagiti kabagyan nga immun-una kenka,
Ubbing, lallakay, nagsublida amin a sangkamaysa
Kas man naulila iti pimmanawen a timekmo.
Bigat ti Sabado idi itulnogdaka ditoy suli ti Sepulveda ken Rinaldi.
Tengnga ti Sylmar, California, Mayo 2003.
Iti tangatang, nagtayab dagiti anghel a nagbalin nga uwak
A nagbalin manen nga anghel
Ket nangpunno iti langit nga awan patinggana.
Tunggal maysa kadakami adda tengngelna a sabong
A nagbalin pakada ti angin
A nagbalin manen a lagip ti biag nga awan patinggana.
PURAW A KABALYO
Masapulakto pay ngata ti dalanko mapan diay Dagui
Ti lennaaw kadagiti karuotan ken ledda
A nagar-araban diay puraw a kabalyo?
Don Pacis May 23, 2004
dpacis626@hotmail.com
|
|
|
|
