Ata dallot dumidinallang Ata dallot dumidinallang! Kadagitoy a tiempo, manmanon a mangngegan ti dallot, aglalo kadagiti poblasion ti kada ili.. . Uray pay kadagiti away wenno nasulinek a lugar a sigud a paggapuan dagiti nalaing a mannallot. Kadagiti estudiante, manmano pay ketdin dagiti makaammo no ania ti dallot ken no kasano nga maaramid daytoy.     Itay napalabas nga Agosto, insayangkat ti Mariano Marcos State University, Batac, Ilocos Norte, ti salip ti dallot kas paset ti selebrasion ti Buwan ng Wika nga addaan tema a "Ang Buwan ng Wikang Pambansa ay Buwan ng mga Wika sa Pilipinas." Ditoy a nagbaballubal dagiti estudiante iti kolehio iti entero nga unibersidad. Naangay ti salip iti Imelda Cultural Center a masarakan iti puseg ti ili ti Batac, Ilocos Norte idi malem ti Agosto 31, 2006 kas paset ti Culminating Program ti nasao a selebrasion, nga indauluan ti Kapisanan ng mga Mag-aaral sa Filipino ti MMSU College of Arts and Sciences.. Ket inyalat ti College of Teacher Education, Laoag City, ti umuna a gunggona a Php 5,000.00 manipud iti Komisyon ng Wikang Filipino ken ti Panrehiong Sentro ng Wikang Filipino nga adda iti MMSU.     Maymaysa a piesa ti napagsasalipan. Nupay kasta, nawaya dagiti nakisalip a nangurnos ken nangted biag iti nasao a piesa babaen ti umiso a choreography ken interpretasion. Iti biang dagiti mannallot manipud iti CTE nga imbagian dagiti BSEd II-A, dua a parang ti dallot nga impakitada: dallot sakbay ti kasar kas iti pananguli ken panangsab-ong; ken dallot kalpasan ti kasar a buklen ti panangikamen ken pamagbaga kadagiti kakaskasar. Iti aniaman a parang ti dallot, umaw-aweng latta ti Ata dallot dumidinallang, Ata dallot dumidinallang. Kakuykuyogna pay ti pannakaiwaras ti prasko ti basi ken buyuboy a paginuman. Adda met nagtokar ti pito ken gitara; kasta met ti biolin kadagiti naituding a paset a pakatokaran dagitoy. Kalpasan amin dagiti nagkatlo a parang, impukkawda, "Agbiag ti dallot! Agbiag!"     Dakkel ti paset ti eskuela iti pannakatagiben ti bukod a pagsasao ken kultura. Ket ditoy MMSU nga idauluan ni Dr, Miriam E. Pascua kas pangulo, maikkan ti pateg ti kultura ken dadduma pay a pakaseknan ni Ilokano. Babaen ti pannnakaisangkat dagiti nadumaduma a salisal kas iti dallot. Ken ti kaadda pay ti Iluko Research and Information Center (IRIC) iti nasao a pagadalan. No patinayon a mairagpin latta met dagiti kannawidan ni Ilokano kadagiti nadumaduma nga asignatura, saanto ngarud a matay dagitoy no di ket mataginayon ken mapasantakda pay, kasta met ti Iluko, ti nakayanakantay a pagsasao!