 |
 |
 |
HAPPY GRADUATION, BURIT!
(Edna Nagtalon)
Dayta ti adadda a pangawagmi, kenka. Ni Tatangmo ken
siak. Ken uray met dagiti naasideg nga ikit, uliteg,
kasinsin
ken kakabagiantayo. Uray pay dagiti kaarruba
a nagbalin nga asideg kenka. Kasano ngamin ket
bugbugtongka nga inanak. You are the apple of our eyes!
Ita a bulan, maibilangka kadagiti rinibu nga agmartsa
tapno awatem ti Certificatemo. Mangipasimudaag a
nalpasmon ti umuna a pangal ti makunkuna a Basic
Education-ti elementaria.
Kasla kaano la daydi. Malagipmo pay laeng idi aldaw a
damom ti sumrek iti Grade I? Nasapaka a nagriing.
Kalpasan a nakapamigat ken nakadigoska, sigagagarka a
nagrubuat. Insuotmo ti baro a pantalon, bado, medias
ken sapatosmo. Binitbitmo ti baro a bagmo a naglaon
met kadagiti baro a notbok, papel, ken pencil casemo.
Sabali pay ti baro met la bag a naglaon ti water jug,
juice ken merienda. Adda pay sumagmamano a labakara
ken t-shirt a pagsukatam. Ket idi nakarubuattan,
nagluganta iti dyip ket sigagagarka a napan eskuela.
Immayka ngarud intulnog agingga iti ridaw ti
classroomyo. Ngamin, kabarbaroka pay laeng iti
eskuela. Sabali ngamin ti nagbasaam idi Nursery ken
Kindergartenka. Kalpasanna, napanak metten idiay
klasek iti kolehio.
Iti recess, gaputta bakantek, immayka manen kinita.
Pambarak a mangsukat ti labakara iti bukotmo. Ken
tapno pagmeriendaenka. Kalpasanna, nagsubliak met
laeng iti uneg ti classroomko. Ket idi namnamaek a
nalpasen ti klasem iti bigat, immayka sinukon. Tapno
aggindanta a mangan ti pangaldaw a balonta. Ken tapno
masukatanka manen para iti malem. Iti malem, kalpasan
ti klase, immayka manen sinukon ket naggiddanta a
nagawid.
Kastoy ti aramidta iti uneg ti makalawas. Kassin' Apo
Dios, saanka a narigatan a nag-adjust. Nasursurom ti
mangururay kaniak no kasta a dika masigud nga umay
kitaen. Immadu dagiti gagayyemmo. Ket sika ti
nagpresidente ti klaseyo.
Saan a napuotan ti panagtulid dagiti aldaw.
Pagammuam, nalpasen ti maysa a tawen. Adu ket adu
dagit nasursurom kabayatan ti umuna a tawenmo. Kas
iti panagbasa, panagkuenta, ken panagsurat. Dayawek
dagiti mangisursuro kenka ta nalaingka nga agbasa.
English man wenno Filipino. Kasano ngamin ket sakbay
a timmapogka iti Grade I, nalaingkan nga agbasa. Adu
ngamin dagiti basbasaen ditoy balay. Naayatka pay nga
agbasa iti Iluko. Bannawag ken biblia iti Iluko.
Ket naipasagepsep kenka tay makunkuna a genuine love
for reading. Pagaayatmo ti agbasa. Kasta met a
saluduak da maestram ta napintas ti suratmo iti print
wenno manuscript. Talaga met ngamin nga ikkanda ti
importansia ti panagsurat. Adda talaga a period no
sadino a masanaykayo nga agsurat. Stanard writng
ngarud ti kaaduan a suratyo.
Idi addakan iti Grad II, naduktalan ni maestram nga
agduyoska iti Art. Ket inyenrolka ngarud iti art
class. Kada malem ti Sabado, yantangay a dika pay
laeng makapaway a mapan Laoag, inananusanka a
kinuykuyog iti balay da maestram. Ditoy a nasursurom
dagiti pagalagadan ti panagkolor. Ken kombinasion
dagiti kolor. Nasursurom pay ti agdrowing kadagiti
simple a banag. Dagitoy ti namunganayam a nagdrowing.
Ket kadagiti sumaganad a tawenmo iti elementaria, adu
dagiti nangabakam iti drowing ken poster making.
Kasta met ti slogan making. Nasursurom pay ti agsurat
iti cursive writing. Saan a pagpangas, uray no idasig
ti suratmo kadagiti kaaduan nga student teachers iti
kolehio, amang a napinpintas ti suratmo. Apresiaren
la unay ni antim a retired teacher ti panagsuratmo.
Banag nga intultuloymo agingga itan ta Grade VI kan.
Gapu iti napintas a gapuanam, nagunggonaanka. Napanta
ngarud nagpasiar idiat Hongkong ken Zhen Zhen, China.
Adu dagiti napasiarmo a lugar. Ocean Park. Victoria
Peak. Windows of the World. Napadasam pay ti
nag-sampan ride ket nakitam dagiti floating
restaurant. Nakitam pay dagiti agkakangayed a pasdek.
Dimo malipatan dagiti nabuyam ken napadasam
Idi Grade III kan, inawatmo ti First Communion. Adu
pay a kontes ti nakiballubalam. Ket idin ta addaka
iti Grade IV, ditoy a nangrugika a timmapog iti
politika. Ket nagasatka met. Nabutusanka a sergeant
at arms ti school clubyo.
|
|
|
 |
|
 |
 |
|
Napilika pay nga staff
writer ti pagiwarnak ti eskuelayo. Intuloymo pay ti
panagatendarmo ti art class. Ket naasa pay ti
kabaelam babaen ti naanus a panangiwanwan kenka ni
maestram. Ket saan la local ti nakikontesam no di pay
ket national ken international pay.
Iti dayta a kalgaw, adda faculty fieldtripmi. Ket
napantayo idiay Villa Escudero, Caliraya, ken Liliw,
Laguna. Sa idiay Rockwell ken dadduma pay a lugar
dita Manila ken kabangibang a siudad. Nanayonan manen
ti padasmo.
Idi Grade V ka, napilika kas associate editor ti
pagiwarnakyo. Filipino ti adadda a pagduyusam. Kas
kadagiti napalabas, adu manen ti nakikontesam. A
nakaipaayan kenka ti pammadayaw.
Iti kalgaw kalpasan ti klase, napantayo idiay Subic
ken Baguio. Dayta ti panagbiahetayo a tallo kada
Tatangmo. Idiay Subic, nakitam dagiti duduogan a
kaykayo. Naimatangam ti napintas ken nadalus nga
aglawlaw. Kasta met idiay Camp John Hay ken dadduma
pay a lugar idiay Baguio.
Kasanguanan ti panagseserrek iti maudi a tawenmo ti
elementaria, pinag-summer classka iti Mathematics.
Daytoy ngamin ti pagkapsutam. Ket idi dumteng ti
panagseserrek, adu manen a kontes ti nakiballubalam.
Immuna a pinadasmo ti nagkandidato para presidente ti
eskuelayo. Daksanggasat ta naabakka. Ket
nagsangitka. Uray met siak, nagarubos met dagiti luak
iti pannakaabakmo. Ngem binagbagaannaka ni Tatangmo.
Impalawagna nga iti daytoy a biag, adda panangabak.
Ken adda met pannakaabak. Ket kalpasan ti
panagsaritayo, naisem manen ti rupam. Nagsubli met
laeng ti ganaygaymo. Naakseptarmo ti pannakaabakmo.
Ket nagbalinka a natured a nangsaranget kadagiti
simmangbay a dangadang - iti man akademiko wenno
extra-curricular activities. Nag-editorka ti
pagiwarnakyo. Nangabakka iti Population Quiz ket
nagun-odmo manen ti maikatlo a pammadayaw iti
provincial level. Iti met ICT quiz, nangabakka ket
sika ti maysa kadagiti napan nakibalubal iti regional
level no sadino a nag-third placekayo. Nakalalagip
pay daydi Investigatory Projectmo maipanggep ti tiesa.
Ken ti epekto ti magnetismo iti panagdakkel ti mula.
Inyalatmo dagiti pirak a medalia kadagitoy dua a
salisal. Napanka pay nakikontes idiay Dagupan City
para iti Regional Schools Press Conference.
Nakaayayat ti panagubingmo. Malaksid kadagiti naadalmo
manipud iti libro, adu pay ti banag a nasursurom. Kas
ti panagluto. Wen, naimas ti lutuem a pansit, meat
balls, fried chicken wenno igado. Wenno dinengdeng
wenno pinakbet. Ken agaramid ti atsara nga itlog.
Kasta met a nasursurom ti aglaba ken agplantsa. Ken
mangtaripato kadagiti mulmula. Naayatka pay nga
agdait wenno agburda. Kangrunaanna, nasursurom pay ti
agkompiuter. Maikompiutermo dagiti bukodmo a project.
Ken ammom pay ti ag-surf iti Internet. Dagitoy makuna
a life-long learning skills a kalasagmo intono
dumakkelka wenno intono mapanka iti ballasiw-taaw, no
mapagasatanka.
Kangrunaanna, nagbalinka met a managtulnog. Ken
managrespetar kadagiti ininauna ngem sika. Kaasin' Apo
Dios, dika napadasan ti nai-guidance wenno nai-office
gapuanan ti kinaalikutegmo. Sapay ta itultuloymo
dagitoy nainsingpetan nga aramid kabayatan ti
panagdakkelmo
Ita ta agraduarkan, adu a medalia ti maiyukkor kenka.
Simbolo dagitoy dagiti adu a nagapuanam. Dimo koma
liplipatan ti agyaman kadagiti mangisursuro a
nagan-anus a nangisuro kenka iti uneg ti innem a
tawen. Kasta met kadagiti amin a nangsuporta kenka.
Ken dagiti gagayyemmo. Kangrunaanna kenni Apo Dios a
nangtarabay ken nangited kenka ti naananay a salun-at
ken siribmo.
Wen, agraduarkan, Burit. Ngem saan a daytoy ti
patinggana. Rugrugi pay laeng ti adadu pay a
dangadang. Ken pannubok. Uray no kasta, dakami kenni
Tatangmo, kablaawandaka iti balligim. Balligi mi
metten. Adu dagiti arapaapmo. Laglagipem nga iti
ania man a ganuatmo, addakamto latta iti likudam.
Sika met laeng ti mangsukog ti masakbayam. Kas tay
kuna tay pagsasao, "Destiny is not a matter of chance;
it is a matter of choice."
Happy graduation, Burit!
***Burit. Short for favorite.
|
|
|
 |
|
 |
