| Author: |
Edna Nagtalon |
| Dated: |
Saturday, January 12 2008 @ 08:09 PM |
| Viewed: |
337 times |
|
 Saan nga asi-asi iti maysa a ganggannaet ti agbaniaga iti ballasiw-taaw tapno matungpal ti nabayagen nga arapaap--ti pannakatunton kadagiti kabagian daydi pimmusayen nga amana. Kas iti panangtunton dagiti Tallo nga Ari iti lugar a nakayanakan ni Ubing a Mesias, kasta met ti panangtunton da agassawa a Dick ken Betty Nagtalon ti lugar a nakayanakan daydi ama ni Dick, ti ili ti Vintar, Ilocos Norte nga awan sabali nga igamda no di ti napnuan panagtalek iti Namaarsua . Ket kas kadagiti Tallo a Masirib a nangisagut iti Ubing a Mesias, sinagutanda dagiti kabagianda, a pakairamanan ti pamilia toy numo toy biang, ti sagut a di magatdan ket uray inton kaanuman ket dinto malipatan – ti pannakairuanganan ken pannakalanang ti sinninged iti maysa ken maysa.
 |
Nairaman toy nagsurat (maikatlo iti kannawan) iti grupo dagiti kabagian a simmabat kada Dick ken Betty apaman a simmangpetda iti Gabu International Airport, Laoag City idi aldaw ti Nob. 29, 2007. |
Iti edadna a 67, nupay makuna a ganggannaet, di impagarup ni Dick a makadanon iti ili a Vintar, ti ili a nakayanakan daydi Dios-ti-aluad nga amana, daydi Jose Semana Nagtalon. “It’s a dream come true,” nayebkas dagiti agassawa. Ket napnuan yamanda ta babaen ti tulong ti Internet, nasapulan ni Dick ti nagan toy nagsurat. Ket babaen ti e-mail a namagrangtay ti nagbaetan ti Escondido, California, USA a nakayanakan ken pagnaedanna ken ti pamiliana ken ti ili a Vintar, nasungbatan dagiti saludsodna maipapan kadagiti kabagian ken maipanggep ti ili a dimmaklan daydi amana. Napagnumuanda ngarud nga agassawa ti umay agbakasion iti uray iti apagbiit laeng.
 |
Kinagrupo da Dick ken Betty Nagtalon (maikadua ken maikatlo iti kannigid) dagiti sumagmamano a mangisursuro iti MMSU College of Teacher Education idi nagpasiarda iti nasao a pagadalan idi Nob. 29, 2007. |
Nupay damoda ti agpa-Pilipinas, dagus ketdi a nayadaptar dagiti agassawa ti bagbagida iti aglawlawda. Kasta met nga uray iti apagdarikmat laeng, napateg a banag kada Dick ken Betty ti pannakakita ken pannakastrekda iti balay daydi amana, ken ti pannakarikna ti bara ti abrasa dagiti kasinsin, kaanakan, appoko ken gagayyem. Sipud daydi malem ti Nob. 29, 2007 nga isasangpetda, di agressat ti innestoria. Nupay di makasao ken makaawat dagiti agassawa iti Iluko, dinayawda ketdi dagiti babbaket ken lallakay ta uray di unay nasayod, makasaoda ketdi iti English ket makapagkikinnaawatanda. “It’s because English was the medium of instruction when they were in elementary grades and in the secondary, “ panangilawlawagko. Di met nagalumiim dagitoy a kabagian nga immasideg kadakuada ta mannakigayyem ken awan panaginkukuna dagiti agassawa, uray pay ni Betty a maysa a Mexicana.
 |
Nagsasarak dagiti agkakabagian—Antonio Nagtalon, Dick Nagtalon, Jose Nagtalon Alcaraz ken Betty Nagtalon. |
Kadagiti simmaruno pay nga aldaw, awan sarday ti panagpasiarda. “We want to see most of Vintar,” kinunada. Ket nakapasiarda agingga iti Barangay 29 San Jose, idiay Surong Valley no sadino a napadasanda ti nagdaliasat kadagiti kabanbantayan ken nagballasiw iti karayan. Nagnada pay iti hanging bridge iti Barangay Dagupan. Kayatda pay koma ti agpa-Surong aginggana idiay Barangay 34 Isic-Isic, ngem daksanggasat ta nabulokan ti naglugananda. Sa ket bassit metten ti nabati pay nga aldaw ti bakasionda.
Inggubetda pay ti napan iti Simbaan Katoliko iti Vintar ken iti Archive ti Bishop’s Palace iti Laoag City bareng matuntunanda pay ti rekord daydi amana. Ngem awan met ti nasapulanda a libro ti Simbaan idi tawen 1904 a maipagarup a pannakayanakna. Ket nagsapul pay kadagiti kabagian a makaited ti impormasion maipanggep ti kaputotan daydi amana.
 |
Ni Betty Nagtalon (naka-blue) ken da: Ilocos Norte SPM Chris Ablan, Vintar SBM Lilia Agbayani ken ni Mr. Jem Nagtalon Reyes, principal ti Vintar Academy kabayatan ti selebrasion ti Vintar Day idi Dis. 4, 2007 iti Vintar Public Auditorium. |
Iti kamaudiananna, dinayawda ti kababalin dagiti Ilokano. Iti taltalon, nakitada ti gaget ken anusda nga agarado ken agraep. Dida inggarup a kasta ti rigat ti panagmula iti pagay a saggaysaen nga itukit dagiti bunubon. Siddaawenda pay no kasano nga agkakalinia ken padapada ti espasio dagiti maitugkel a bunubon. “How do they do it?” dinamag ni Dick. “Through mere calculation.” insungbatko. Saluduanda ngarud dagiti Ilokano. Naamuanda pay dagiti napintas a galad kas iti kinasalimetmet. “My father was also like that,” kinunana. “We would not have traveled this far were we not thrifty,” insungbat met ni Betty.
 |
Sumagmamano kadagiti agkakabagian a Nagtalon iti panagpiknikda iti salugan a masarakan iti Bgy. 5 San Ramon. |
Padas-Ilokano dagiti napadasanda. Kas iti panaglugan ti kalesa wenno tricycle manipud iti puseg ti Siudad ti Laoag agingga iti Palazzo de Laoag a naghotelanda. Wenno panaglugan iti jeepney manipud iti Laoag agingga iti Vintar. Ken pannakimisa iti Iluko iti bigat ti Domingo ken iti alas kuatro iti parbangon idi damo ti Misa de Gallo. Nairanada pay iti brownout iti maysa a rabii kabayatan ti kaaddada iti hotel. Iti uneg ti 15 minutos, dida kano ketdi nag-panik kabayatan ti brownout. No maipanggep kadagiti makmakan wenno masidsida, naramananda met ti pakbet-Ilokano, dinengdeng a bulong ti marunggay, dinardaraan, adobo ken tinola a manok. Inimasda pay ti tupig, bibingka ken tinudok; liningta a saba ken mais. Nagustuanda pay dagiti prutas kas iti tsiko, mangga, papaya ken water melon. Ken sabsabali pay kas iti empanada. Naimatanganda pay no kasano ti panagaramid iti bibingka manipud pannakaigad ti niog, panangpespes ti gettana agingga iti pannakagamay ti bellaay ken pannakalutona. Banag nga aramidento kano ni Betty intono agsubli idiay California.
Iti sabali a bangir, kabayatan ti panagpasiarda iti Pagudpud, Burgos ken Pasuquin, adu met ti inda naimatangan ken napadasan. Kas iti panagramid ti asin ken pananguli iti Burgos Lighthouse. Ken panangpasiar iti windmills sadiay Bangui.
Nupay apagbiit laeng ti panagpasiarda, malaglagipto latta ti pamilia Nagtalon ti isasarungkar da Dick ken Betty. Impamatmatda ti kinapateg ti pamilia a naggapuan ti amana ken ti panangtunton ti puon ti pamilia ta di kad daytoy ti makunkuna a pamunganayan ti sangkagimongan?
Nupay napnuan sentimiento daydi malem a panagpipinnakadami, naragsak dagiti agassawa a nagsubli iti lugarda. Imetda dagiti sangabalkot a namaris ken napnuan lagip a padas. Ken listaan dagiti kabagian a natuntunanda. Paset ti surat nga imbatida kadakami: “How can we ever thank you for making our trip so meaningful and wonderful?... Our thoughts will be with you from this day forward,,. We will carry warm memories of your family in our hearts forever.”
Sapay koma ta ad-adu pay ti kas kadakuada a ganggannaet ti umay met mangtunton ti bukodda a ramut ken naggapuan.
|
|
 |
|
