Manipud iti Departamento ti Edukasion (DepEd) ken kasta met dagiti Teacher Education Institutions iti Rehion I, agdagup 135 dagiti dimmar-ay a bukbuklen dagiti mangisursuro iti Grade I - III, dagiti administrador ken propesor iti kolehio a mangisursuro kadagiti professional education courses. Addada pay Day Care Workers a timmabuno. Dimmar-ay met ni Dr. Cherrie Melanie Ancheta Diego, chief ti Technical Services Division ti Commission on Higher Education, Region I, kas nangisuno ken ni Dr. Caridad O. Abuan, OIC director. Timmalantan pay ni Atty, Ramon A. Leano, Vice President for Administration ti MMSU a nangisuno met ken ni Dr. Miriam E. Pascua, presidente.
Panglukat a Programa
Naluktan ti taripnong babaen iti ababa a programa kas pangsarabo kadagiti timmabuno. Nangipaay ti CTE Chorale iti kanta pangdaydayaw iti Namarsua sa naisaruno ti Nailian a Kanta iti Iluko (kas impatarus ni Prop. Gregorio T. Amano, sigud a propesor ti MMSU College of Technology}. Inted met ni Dr. Eduardo T. Borja, dekano ti pagadalan ti balikas-pannarabo. Kalpasanna, nagsubli met la manen ti CTE Chorale tapno ipangngegda ti kanta nga “Amianan.”
Inyam-ammo met ni Prof. Edna C. Nagtalon dagiti timmabuno manipud Pangasinan, La Union, Ilocos Sur ken Ilocos Norte. Iti dagup a 135, adda dua manipud Pangasinan; lima manipud La Union; 13 manipud Ilocos Sur ken dagiti nabati pay naggapuda iti Division of Ilocos Norte, Laoag City ken Batac, karaman payen dagiti Day Care Workers, ken dagiti delegado manipud iti Northern Christian College ken MMSU College of Teacher Education.
Nagsarita met ni Dr. Diego ken imbasana ti mensahe ni Dr. Abuan. Ditoy a kinablaawanna ti MMSU-CTE iti panangidaulona daytoy a ganuat. Innayonna a dagiti mangisursuro nga Ilokano ket agdindinnamag ti kinagaget ken kinasaldetda gapuna nga adun dagiti napatanorda a mabigbig a lider ken agserserbi iti nadumaduma a sektor, ditoy man ken iti ballasiw-taaw. Mangnamnama a no Iluko ti mausar iti panangisuro, ad-adunto manen a bannuar, nasaririt nga agserbi ken mangidaulo. Iti biang met ni Atty. Ramon Leano, indagadagna met ti panagusar iti Iluko. Kas kenkuana ken dagiti kataebna, naisuroda iti Iluko iti umuna a tukad ti pagadalan.
Insaruno nga impalawag ni Dr. Alegria T. Visaya ti namkuatan ken dagiti panggep ti taripnong.
Diskusion/Lektiur
Nadumaduma dagiti naisagana a mapagsasaritaan kabayatan iti taripnong. Umuna nga imbinsabinsa ni Dr. Jaime G. Raras, research coordinator ti University of Northern Philippines, Candon City campus “Ti Panagdur-as ti Ilokano kas Nailian a Pagsasao.” Inlawlawagna no apay a napagtalinaed ti Iluko a sipapannakkel nga agam-ampayag iti tay-ak dagiti nadumaduma a pagsasao iti lubong gapu iti kaadda dagiti naimaldit ken dadduma pay a rason no apay a natibker, nakidser ken bumilbileg ti bukodtayo a pagsasao, iti laksid ti adun a nakasuotanna.
Imbinsabinsa met ni Dr. Cecilia P. Aribuabo, Schools Division Superintendent ti Division of Ilocos Norte dagiti sangapulo a “Kangrunaan a Sagudayen ti DepEd Order No. 74. series 2009.”
Binagi met ni Prof. Marlina L. Lino a diniskutir ti suheto a ti “Dagiti Rason no Apay a Nalalaing dagiti Ubbing a Filipino no Agusarda iti Bukodda a Lengguahe.” Immuna a sinalysayna dagiti gakat ken addang a nanipudan ti pannakausar ti nakayanakan a pagsasao iti panangisuro. Insarunona dagiti rason maibasar kadagiti sukisok a mangipaneknek ti kinalaing dagiti ubbing no bukodda a sao ti maaramat.
Maipanggep met ti Ortograpia ken Grammar ti Iluko ti trinatar ni Mr. Reynaldo E. Andres, mannurat ken kameng ti Ilocos Agricultural Resources Research and Development Consortium (ILARRDEC) iti MMSU. Ditoy a naduktalan dagiti nagpartisipar dagiti pagalagadan iti spelling ken grammar iti Iluko.
It maikadua nga aldaw, adda pay nabati nga uppat nga agipalawag. Umuna ni Dr. Estrella R. Calixto, Research Director, Northwestern University, Laoag City, a nangipalawag kadagiti nadumaduma nga estratehia iti panangisuro ti panagbasa manipud iti alphabetic method aginggana iti eclectic method. Naginggaanna a nagkakantada amin iti kadaanan a kanta “ Alla agaluadka, ibagaka ken maestra, innalam diay bola a dimo imbagbaga. Uray no innalak, ta diak met tagikuaen, binulodko laeng ta gustok nga ayayamen.” Ket sigagagarda a nangisala ti kanta; kasta met sinursuroda pay dagiti sabali pay a kanta ken daniw a kadaanan.
Insaruno met ni Mr. Joel B. Manuel, napadayawan a mannurat iti Iluko ken prinsipal ti Banna National High School, Banna, Ilocos Norte ti nagsarita. Sinupusopanna dagiti immunan a naipalawag maipanggep ti DepEd Order No. 74, series 2009. Kangrunaanna, inna impalawag ti topiko “Panagsurat iti Sarita a Para Ubbing ken Panangaramid iti Giya ti Panagbasa.” Nangiparang pay iti maysa nga istoria para ubbing ken ti giya iti panangisuro a naibasar iti daytoy a sarita. Bukodna a putar ti impabasana..
Iti malem, immuna a naglektiur ni Prof. Rose Francis E. Mina maipanggep iti “Dagiti Konsepto ken Panagkanaig ti Panangisuro ken Teknolohia. Ginutigotna dagiti partisipante tapno agusarda iti mayannatup a teknolohia iti panangisuro iti nakayanakan a pagsasao tapno adadda a maawatan ken matandaanan dagiti ubbing dagiti nasursuroda, malaksid pay ta pasantakenna ti panagpanunotda.
Naudi a nagpalawag ni Dr. Alegria T. Visaya maipanggep kadagiti resulta ti panagsukisok ditoy pagiliantayo ken iti pay ballasiw-taaw a mangipaneknek a nalalaing dagiti ubbing a naisuro iti nakayanakanda a pagsasao.
Pangrikep a Programa
Kalpasan a naillawlawag dagiti napagsasaritaan, naaramid ti pangrikep a programa. Ditoy nga inted dagiti sumagmamano a partisipante dagiti impresionda iti naangay a taripnong. Indaniw pay ket ni Mrs. Jannet Marco ti impresionna. Kasta pay a nangipaay pay ni Dr. Raras iti sangabassit a mensahe. Indauluan met ni Mrs. Agustina R. Velasco ti panagsapata amin a partisipante a mangsuporta ti MLE iti bukodda a pagadalan. Pormal a narikpan ti programa babaen ti pannakaibunong dagiti Pammaneknek iti Itatabuno. Naikkan met dagiti lektiurer iti Pammaneknek iti Pammadayaw. Nakanta ti “Dungdunguenkanto,” kasanguanan a nagsisina ti grupo.
Dagiti Sumaruno nga Addang
Nailungalong ti kaadda manen ti sumaruno a taripnong babaen ti liderato ti MMSU CTE tapno marugianen ti panagsurat kadagiti ramit iti panangisuro kangrunaanna kadagiti libro a kasapulan.