Namnama Para Kenni Harold
Edna C. Nagtalon

Kalpasan a nagraduar kas 4th honors iti Vintar
National High School, Vintar, Ilocos Norte itay
napalabas nga Abril, awanen ti namnama pay ni Harold
Brylle Butac, taga-Bgy. 28, Bago iti nasao nga ili a
makapagtuloy pay iti kolehio, nupay nasged unay ti
tarigagayna a makapagbasa ken makaturpos. Limada nga
agkakabsat ket isu ti maikadua nga inaunaan.
Nagsardeng ti manangenna a nagturposen iti high school
gapu iti rigat ti panagbiagda. Kadawyan nga
agtaltalon dagiti nagannak kenkuana a da Henry ken
Margarita.

Agingga a naamuan ni Harold, babaen ti tulong Maestro
Gil Raval, ti maipanggep ti scholarship grant ti
Vintarinians of California. Maidiaya daytoy kadagiti
deserving students a nagraduar manipud kadagiti tallo
a pagadalan ti sekundaria iti Vintar; agenrol iti
Mariano Marcos State University College of Teacher
Education ken mangala ti kurso a kinamangisursuro, iti
man elementaria wenno sekundaria. Panggep daytoy
naindaklan a proyekto ti makatulong tapno maital-o ti
kasasaad dagiti agkasapulan ken tapno magutigot met
dagiti dadduma pay nga agtutubo nga agadal.

Nagaplay ngarud ni Harold para iti nasao nga
scholarship. Kadagupan kadakuada a tallo, isu ti
pinili ti scholarship committee ti asosasion a buklen
da Primo Pacis, chairman; Nila Flores, vice chairman;
ken Ormy Malasig, Rudy Sagun, ken Nelia Tunac,
members. Ket itay primero ti Agosto, inted ti
asosasion ti grant a US $200.00 para iti tuition ken
matriculation fees ken book allowance para iti
makatawen a panagbasana, Inyawat daytoy ti local
scholarship committee a buklen da: Dr. Eduardo Borja,
Dr. Cecilia Aribuabo ken Mrs. Edna Nagtalon.
Naimatangan ni Mrs. Butac ti pannakayawat ti nasao a
gatad iti mismo a sanguanan ti pagadalan.

"Dakkel a yaman ti pamiliami daytoy nga impaay ti
Vintarinians of California," kinuna ni Mrs. Butac.
"Makatulong iti panagbasa ni Harold. Narigat unay ti
panagbiagmi ket dimi kabaelan nga isakad ti panagbasa
ni Harold.a bukbukodmi"

Iti met biang ni Harold, maragsakan unay ti kaadda
dagiti maseknan a tumultulong para iti pagsayaatan
dagiti nakurapay a kailianda. "Makapagsubalitak laeng
babaen ti naan-anay ken napasnek a panagbasak. Sapay
koma ta matun-uyak ti arapaapko babaen ti tulong ti
Vintarinians of California," impeksa ni Harold.

__________________________________________________