Nadanon tay manen ita a lawas ken ita nga aldaw ti kapapatgan ken kangrunaan a kanito iti sibubukel a pakasaritaan ti Cristianismo. Wen, agsipud ta iti Viernes Santo, matimud ken mangngeg dagiti nasakit ken nasanaang a balikas a nagayus iti kaunggan ti puso ken barukong ti nailansa iti krus nga Anak ti Dios. “Mawawak.” Daytoy ti maikalima a balikas ni Cristo idin a sibibissayot iti krus. Aggurigor, agpigpigerger, nakapsuten. Iti baet daytoy, inyebkasna ti kababaan kadagiti pito a balikasna, “Mawawak.” Naasi met ti maysa a soldado kenkuana. Ket insawsawna ti espongha iti suka. Sana inpaamlid iti bibig ni Kristo ket daytoy man ti nangtiped iti wawna. Numan pay apagkanito man laeng. Wen naasian ti soldado ngem iti baet ti panangngaasina, adda naibinggas a gura ken pungtotna. Imbes a sangabaso a danum ti inyasidegna, suka ketdi ti napanunotna. Anian a nakakaskas-ang a panagayat iti Dios Anak a sagut ti Dios Ama tapno subbotennatayo kadagiti adu a basbasol. No intay utuben ken amirisen a naimbag, apay nga inbalikas ti Dios daytoy? Dios a Mannakabalin. Namarsua kadagiti baybay. Karkarayan ken ubbog. Nalakana laeng koma a pinaadda ti kasapulanna a danum. “Mawawak,” kinunana. Daytoy, ipakitana nga isu ket tao a makarikna met iti saem, pannakaupay ken pannakawaw. Kas met kadatayo. Aglalo kadagiti masaksakit, no iyebkasda ti pannakawawda, dagdagusen tay ti mangyasideg ti danum. Kas pangsilpo ti biag ken angesda. Iti sabali a bangir, saan a danum ti masapul ni Kristo idi ibalikasna ti, “Mawawak.” Kadagitoy a tiempo, adu a banbanag ti pakawawan ti Dios kadatayo a parsuana. Umuna unay, mawaw iti kaadda ti ayat iti kada miembro ti kada pamilia. Mawaw a makakita iti nasayaat a panagtitinnunos dagiti annak ken nagannak, ta di kadi ti pamilia ti masasao a pundasion ti sosiedad? Mawaw ni Kristo kadagiti nagannak a mangisuro kadagiti annakda iti napipintas nga ugali. Kas iti kinasingpet ken kinamanagdayaw iti Dios ken iti padana a tao. Mawaw pay ti Dios kadagiti agtuturay a napudno iti takemda. Ken kasta met kadagiti empleado nga agserbi saan ket a paserserbian. Kasta pay a mawaw kadagiti natulnog nga umili. A tumulong iti panagrang-ay; saan ket nga agperdi. Kangrunaanna, mawaw pay ti Dios ti kaadda ti naan-anay a kappia ditoy daga. Nangnangruna ditoy pagiliantayo ta pagaammotayo ti kaadda ti susik iti nagbabaetan dagiti nadumaduma a puwersa ken kasta met ti kaadda dagiti krimen a mapaspasamak iti aglawlaw tayo. Mawaw met ti Dios iti nasayaat a panangtagiben tayo iti aglawlaw tapno iti kasta mayadayotayo kadagiti layus, tikag ken dadduma pay a didigra. Gapuanan met laeng ti kinadamsak ken kinamanagbaybay-a ti tao. Mawaw pay ti Dios iti intay panagbabawi kadagiti basbasoltayo ken kadagiti umay agdaydayaw kenkuana. Kasta met kadagiti mangiwaragawag iti Sao ti Biag. Saantay koman nga urayen a makapungtot ti Dios kadatayo. Inton dumteng dayta a tiempo, amangan ta naladawton ti amin ket kunananto, “Idi a mawawak, pinainumnak kadi?” Kakabsat ken Cristo, adu ket adu dagiti pakawawan ti Dios kadatayo. Saantay ngarud nga agintutuleng wenno aginbubulsek kadagitoy. Panawenen tapno intay punuen ti kopana babaen kadagiti nadiosan nga aramid. Ita a Semana Santa, dawatentay kenni Apo Dios ti panagsingsingpettayo. Sangsangkamaysa tayo ngarud nga agkararag ket kunatayo: Apo Dios, agyamankami iti kinamagayatmo kadakami. Agyaman kami ta uray no managbasol kami ket pinakawannakami ket maikaikami iti naindaklan a sagut ti pannakaisalakan. Tulungannakami met a mangawis kadagiti gagayyemmi ken sabsabali pay nga umay agdayaw ken agrukbab kenka. Tulungannakami, O Dios, ket palagipannakami iti agnanayon. Amen.