 |
 |
 |
 |
Umanges no kua dagiti pasilio
Iti sangsangadangan nga espasio
Ti biag iti likmut ti Statue Square
Agapon ngamin dagiti rikna
A ginugoran iti iliw a rumkuas
Iti nakipet a bulsa ti wayawaya
Kas koma ita a malem ti Domingo
A pannakailansa manen dagiti darikmat
A sandi't linibasam agdardaras nga oras
Saksian no kua ni Sir George
Dagiti maipadigo a balon a potahe
Ti biag a linuto ni kailian
Iti karkarna a paryok ti seggar
Ditoy kusina ti ragsak ti Hongkong
Ay, agburnok latta ti isem
A wirawiren dungngo dagiti rupa
A nakairuamam suero dagiti kettang
Urat ti anus a mangibakbaklay
Nalayog nga arapaap mariingam a parbangon
Dagiti kasingin ti kararag
A kaputed ti biag!
|
|
|
 |
|
 |
|
|
|
 |