 |
 |
 |
 |
Dinto margaay ti tibker
Sallukob pundasion ti wayawaya...
Adda nagan tunggal dara nga agsayasay
Mangikur-it kinamaingel ti puli
Kinaagnanayon dagiti padeppa
A mamagkamang puseg ti tugot
Dagiti nariingam a bannuar
Ta maymaysa ti boses
Ti kari namuonan a daton
Maibuis ti anges a karudkod
Ti pammati nga agepen
Arban iti ikub ti linteg
A simbeng dagiti ayug ken kutibeng.
Wen, adda sam-it ti biag iti ipupusay
A mangsubbot ti talna't nakaparsuaan
Ta dinto agrupsa ti lagip
Ti nagpasagan nainaw a prinsipiom
Gangannaet ti wayawaya
Kadigiti mayat a maparukma.
Rumasok a rumasok man ti panawen
Mangigayang apuy sidong Ina a Daga
Dinto mapadso dagiti arapaap
Rumkuas latta anges dagitoy a binatog
A pagsampagaan dagiti saringit
Dagiti tumakder iti karit
Malalaki a sadiri ti puli!
|
|
|
 |
|
 |
|
|
|
 |